लिपिक, वाहनचालकांसह वर्ग-४ कर्मचाऱ्यांसाठी मोठी बातमी! ४५९ पदांना मंजुरी; सुधारित वेतनश्रेणी जाहीर

मुंबई : Class 4 Employee Salary : महाराष्ट्र शासनाच्या विधी व न्याय विभागाने राज्यातील सरकारी कर्मचाऱ्यांसाठी महत्त्वाचा शासन निर्णय जारी केला आहे. मुंबई उच्च न्यायालयाच्या कोल्हापूर येथील फिरते खंडपीठासाठी विविध संवर्गांतील तब्बल ४५९ पदांच्या निर्मितीस मान्यता देण्यात आली आहे. ७ ऑक्टोबर २०२६ रोजी निर्गमित करण्यात आलेल्या या शासन निर्णयात गट-अ, गट-ब, गट-क आणि गट-ड संवर्गातील पदांची संख्या तसेच वेतनश्रेणी निश्चित करण्यात आली आहे. विशेष म्हणजे, यामध्ये लिपिक, वाहनचालक आणि वर्ग-४ कर्मचाऱ्यांच्या वेतनश्रेणीचा समावेश असल्याने कर्मचाऱ्यांचे या निर्णयाकडे लक्ष वेधले आहे.

गट-ब संवर्गातील पदांना S-20 वेतनश्रेणी

शासन निर्णयानुसार गट-ब संवर्गातील कक्ष अधिकारी, सॉफ्टवेअर इंजिनिअर, हार्डवेअर इंजिनिअर आणि वरिष्ठ भाषांतरकार व दुभाषी या पदांचा समावेश करण्यात आला आहे. या पदांसाठी S-20 वेतनश्रेणी लागू करण्यात आली असून मूळ वेतन ५६,१०० ते १,७७,५०० रुपये असे आहे. कक्ष अधिकारी, सॉफ्टवेअर इंजिनिअर आणि हार्डवेअर इंजिनिअर या पदांसाठी चार वर्षांनंतर S-23 वेतनश्रेणीची तरतूद नमूद करण्यात आली आहे.

लिपिक आणि वाहनचालकांसाठी S-10 वेतनश्रेणी

गट-क संवर्गातील कर्मचाऱ्यांसाठीही या शासन निर्णयात महत्त्वाची तरतूद करण्यात आली आहे. लिपिक आणि वाहनचालक या दोन्ही पदांसाठी S-10 वेतनश्रेणी निश्चित करण्यात आली आहे. त्यानुसार या पदांचे मूळ वेतन २९,२०० ते ९२,३०० रुपये असे आहे.

या खंडपीठासाठी लिपिकाची १७२ पदे, तर वाहनचालकाची ७ पदे मंजूर करण्यात आली आहेत. विशेष म्हणजे, वाहनचालक पदासाठी नमूद करण्यात आलेली S-10 वेतनश्रेणी ही या निर्णयातील लक्षवेधी बाब ठरली आहे.

वर्ग-४ कर्मचाऱ्यांच्या वेतनश्रेणीबाबतही महत्त्वाची तरतूद. Class 4 Employee Salary

गट-ड अर्थात वर्ग-४ संवर्गातील विविध पदांचाही या निर्णयात समावेश आहे. यामध्ये हवालदार, चोपदार, नायलर, पुस्तक बांधणीकार, नाईक, झेरॉक्स ऑपरेटर, उद्वाहनचालक, शिपाई, हमाल, पहारेकरी, स्वयंपाकी, माळी आणि सफाईगार या पदांचा समावेश करण्यात आला आहे.

या पदांसाठी पुढीलप्रमाणे वेतनश्रेणी नमूद करण्यात आली आहे.

हवालदार, चोपदार, नायलर आणि पुस्तक बांधणीकार या पदांसाठी S-10 वेतनश्रेणी असून मूळ वेतन २९,२०० ते ९२,३०० रुपये आहे.

नाईक, झेरॉक्स ऑपरेटर आणि उद्वाहनचालक या पदांसाठी S-4 वेतनश्रेणी असून मूळ वेतन १७,१०० ते ५४,००० रुपये आहे.

तर शिपाई, हमाल, पहारेकरी, स्वयंपाकी, माळी आणि सफाईगार या पदांसाठी S-3 वेतनश्रेणी असून मूळ वेतन १६,६०० ते ५२,४०० रुपये निश्चित करण्यात आले आहे.

एकूण ४५९ पदांना मान्यता; गटवार पदसंख्या किती?

या शासन निर्णयानुसार एकूण ४५९ पदांना मान्यता देण्यात आली आहे. त्यामध्ये गट-अ संवर्गातील २० पदे, गट-ब संवर्गातील ३५ पदे, गट-क संवर्गातील २७६ पदे आणि गट-ड संवर्गातील १२८ पदांचा समावेश आहे.

वेतनश्रेणीबाबत महत्त्वाची अट

दरम्यान, या पदनिर्मितीला मान्यता देताना संबंधित पदांच्या वेतनश्रेणी वित्त विभागाकडून प्रमाणित करून घेण्याची अट घालण्यात आली आहे. त्यामुळे शासन निर्णयात नमूद केलेल्या वेतनश्रेणीसंदर्भातील पुढील कार्यवाही वित्त विभागाच्या प्रमाणिकरणानुसार होणार आहे.

एकंदरीत, मुंबई उच्च न्यायालयाच्या कोल्हापूर फिरत्या खंडपीठासाठी मंजूर करण्यात आलेली ४५९ पदे आणि त्यांच्यासाठी नमूद करण्यात आलेल्या वेतनश्रेणी सरकारी नोकरीच्या क्षेत्रातील महत्त्वाची घडामोड मानली जात आहे.

महत्त्वाची नोंद : हा शासन निर्णय विशिष्ट न्यायालयीन खंडपीठासाठी मंजूर करण्यात आलेल्या पदांशी संबंधित आहे. त्यामुळे राज्यातील सर्व विभागांतील लिपिक, वाहनचालक किंवा वर्ग-४ कर्मचाऱ्यांना ही वेतनश्रेणी आपोआप लागू झाली आहे, असा त्याचा अर्थ होत नाही.

Leave a Comment