राज्य सरकारी कर्मचाऱ्यांसाठी महत्त्वाचा निर्णय; 31 ऑगस्ट 2026 रोजी GR निर्गमित.
मुंबई : Maharashtra Government Employees : राज्यातील सरकारी अधिकारी-कर्मचाऱ्यांसाठी महत्त्वाचा शासन निर्णय 31 ऑगस्ट 2026 रोजी जारी करण्यात आला आहे. या निर्णयानुसार विविध प्रशासकीय विभागांच्या आस्थापनेवर असलेल्या काही अस्थायी पदांना मुदतवाढ देण्यास मान्यता देण्यात आली आहे. त्यामुळे संबंधित पदांवर कार्यरत असलेल्या कर्मचाऱ्यांना दिलासा मिळणार आहे.
शासन निर्णयानुसार, प्रशासकीय विभागांच्या आकृतिबंधात यापूर्वीपासून समाविष्ट असलेली अस्थायी पदे तसेच यापूर्वी आढावा मंजूर केल्यानंतर निर्माण करण्यात आलेली, मात्र अद्याप आकृतिबंधात समाविष्ट न झालेली अस्थायी पदे 1 सप्टेंबर 2026 ते 28 फेब्रुवारी 2027 या कालावधीपर्यंत पुढे सुरू ठेवण्याचा अधिकार देण्यात आला आहे.
सुधारित आकृतिबंधाला मान्यता घेणे आवश्यक
या मुदतवाढीच्या कालावधीत संबंधित प्रशासकीय विभागांना त्यांच्या आस्थापनेवरील तसेच त्यांच्या नियंत्रणाखालील कार्यालयांच्या आस्थापनेवरील मंजूर पदांचा आढावा घ्यावा लागणार आहे.
या आढाव्यानंतर आवश्यकतेनुसार सुधारित आकृतिबंधाचा प्रस्ताव उच्चस्तरीय सचिव समितीसमोर सादर करून मान्यता घेणे आवश्यक असल्याचे शासन निर्णयात नमूद करण्यात आले आहे.
विशेष म्हणजे, सुधारित आकृतिबंध निश्चित करण्यासाठी दिलेल्या कालावधीनंतर पुन्हा मुदतवाढ देण्यात येणार नसल्याचेही स्पष्ट करण्यात आले आहे. त्यामुळे संबंधित विभागांना या कालावधीत आवश्यक कार्यवाही पूर्ण करावी लागणार आहे.
वित्त विभागाला माहिती सादर करण्याच्या सूचना
सर्व प्रशासकीय विभागांनी त्यांच्या स्वतःच्या आस्थापनेवरील तसेच नियंत्रणाखालील क्षेत्रीय कार्यालयांमधील पदांचा आढावा घेऊन सुधारित आकृतिबंधाचा प्रस्ताव तातडीने वित्त विभागाकडे सादर करण्याचे निर्देश देण्यात आले आहेत.
मुदतवाढ देण्यात येणाऱ्या पदांची विभागनिहाय एकत्रित माहिती असलेला तपशील 15 सप्टेंबर 2026 पूर्वी वित्त विभागाला उपलब्ध करून देण्याचे आदेश देण्यात आले आहेत.
तसेच, संबंधित अस्थायी पदांना मुदतवाढ देण्यात आलेल्या शासन निर्णयाची एक प्रत 20 सप्टेंबर 2026 पूर्वी वित्त विभागाला सादर करण्याच्या सूचना देण्यात आल्या आहेत. Maharashtra Government Employees
या निर्णयामुळे सध्या कार्यरत असलेल्या संबंधित अस्थायी पदांचे अस्तित्व पुढील सहा महिन्यांसाठी कायम राहणार असून, त्यानंतरच्या कालावधीसाठी सुधारित आकृतिबंधानुसार पुढील निर्णय घेण्याची प्रक्रिया होणार आहे.
स्रोत : महाराष्ट्र शासनाचा 31 ऑगस्ट 2026 रोजीचा शासन निर्णय.
नमस्कार employeesindia.in हि एक न्युज पोर्टल आहे . या पोर्टल वर तुम्हाला तुमच्या हक्काच्या ताज्या घडामोडी वाचण्यास मिळतील . मला पत्रकारिता क्षेत्रामध्ये 5 वर्षाचा अनुभव आहे त्याचा मी या पोर्टल वर लिखाणासाठी उपयोग करत आहे करत आहे .